{"id":76961,"date":"2026-03-04T16:05:58","date_gmt":"2026-03-04T16:05:58","guid":{"rendered":"https:\/\/permbledhja.com\/?p=76961"},"modified":"2026-03-04T16:05:58","modified_gmt":"2026-03-04T16:05:58","slug":"zyrtare-konjufca-kandidat-i-vv-se-per-president-thirrje-opozites-per-konsensus","status":"publish","type":"post","link":"https:\/\/permbledhja.com\/sq\/zyrtare-konjufca-kandidat-i-vv-se-per-president-thirrje-opozites-per-konsensus\/","title":{"rendered":"Zyrtare: Konjufca kandidat i VV-s\u00eb p\u00ebr president, thirrje opozit\u00ebs p\u00ebr konsensus"},"content":{"rendered":"

L\u00ebvizja Vet\u00ebvendosje ka njoftuar se do t\u00eb propozoj\u00eb p\u00ebr President t\u00eb Republik\u00ebs s\u00eb Kosov\u00ebs ministrin e Pun\u00ebve t\u00eb Jashtme dhe Diaspor\u00ebs, Glauk Konjufca, pas d\u00ebshtimit p\u00ebr t\u00eb arritur nj\u00eb marr\u00ebveshje me partit\u00eb opozitare p\u00ebr nj\u00eb kandidat konsensual.<\/strong><\/p>\n

Sipas njoftimit t\u00eb subjektit fitues t\u00eb zgjedhjeve t\u00eb 28 dhjetorit 2025, t\u00eb cilat u mbajt\u00ebn pas nj\u00eb bllokade mbi dhjet\u00ebmujore, qytetar\u00ebt dhan\u00eb \u201crezultatin m\u00eb t\u00eb qart\u00eb n\u00eb historin\u00eb e Kosov\u00ebs s\u00eb pasluft\u00ebs\u201d, duke votuar kund\u00ebr bllokimit institucional dhe n\u00eb favor t\u00eb themelimit t\u00eb institucioneve.<\/p>\n

LVV thekson se, n\u00eb p\u00ebrputhje me k\u00ebt\u00eb rezultat, pa vones\u00eb jan\u00eb konstituuar Kuvendi i Kosov\u00ebs dhe Qeveria e Kosov\u00ebs, nd\u00ebrsa procesi i radh\u00ebs \u00ebsht\u00eb zgjedhja e Presidentit, p\u00ebr t\u00eb cil\u00ebn k\u00ebrkohet pjes\u00ebmarrja e t\u00eb pakt\u00ebn 80 deputet\u00ebve n\u00eb sall\u00eb.<\/p>\n

Partia n\u00eb pushtet b\u00ebn t\u00eb ditur se ka ftuar disa her\u00eb n\u00eb takim subjektet m\u00eb t\u00eb m\u00ebdha opozitare, me q\u00ebllim gjetjen e nj\u00eb emri t\u00eb p\u00ebrbashk\u00ebt p\u00ebr pozit\u00ebn e presidentit. Megjithat\u00eb, sipas saj, nga opozita nuk ka pasur propozime konkrete dhe jan\u00eb refuzuar edhe ofertat me emra t\u00eb caktuar t\u00eb paraqitura nga LVV.<\/p>\n

\u201cSubjekti yn\u00eb politik \u00ebsht\u00eb i bindur se n\u00eb vendin ton\u00eb ka shum\u00eb emra t\u00eb denj\u00eb p\u00ebr k\u00ebt\u00eb pozit\u00eb t\u00eb r\u00ebnd\u00ebsishme shtet\u00ebrore, rreth t\u00eb cil\u00ebve do t\u00eb mund t\u00eb nd\u00ebrtohej nj\u00eb pajtueshm\u00ebri p\u00ebr t\u00eb ecur p\u00ebrpara. N\u00eb k\u00ebt\u00eb faz\u00eb, zgjedhjet e reja do t\u00eb ishin krejt\u00ebsisht t\u00eb panevojshme\u201d<\/em>, thuhet n\u00eb reagim.<\/p>\n

N\u00eb k\u00ebto rrethana, LVV ka vendosur t\u00eb propozoj\u00eb zyrtarisht Glauk Konjufc\u00ebn si kandidat p\u00ebr president. N\u00eb njoftim theksohet p\u00ebrvoja e tij si ish-kryetar i Kuvendit, deputet i shtat\u00eb legjislaturave dhe nj\u00eb nga politikan\u00ebt m\u00eb t\u00eb votuar n\u00eb historin\u00eb e vendit.<\/p>\n

Nj\u00ebkoh\u00ebsisht, LVV u ka b\u00ebr\u00eb thirrje s\u00ebrish partive opozitare q\u00eb t\u00eb propozojn\u00eb nj\u00eb kandidat, duke ofruar edhe mb\u00ebshtetje me n\u00ebnshkrime nga grupi parlamentar i saj, n\u00ebse kjo do t\u00eb ishte e nevojshme p\u00ebr formalizimin e kandidatur\u00ebs.<\/p>\n

\u201cJemi t\u00eb bindur se kjo sfid\u00eb \u00ebsht\u00eb e kalueshme, zgjedhjet jan\u00eb t\u00eb evitueshme dhe \u00ebsht\u00eb plot\u00ebsisht e mundshme t\u00eb gjejm\u00eb pajtueshm\u00ebri p\u00ebr t\u00eb ecur p\u00ebrpara\u201d<\/em>, thuhet n\u00eb fund t\u00eb reagimit.<\/p>\n