{"id":41266,"date":"2024-01-03T11:17:40","date_gmt":"2024-01-03T11:17:40","guid":{"rendered":"https:\/\/permbledhja.com\/?p=41266"},"modified":"2024-01-03T11:17:40","modified_gmt":"2024-01-03T11:17:40","slug":"me-sy-nga-kosova-jeta-ne-fshatin-borje-te-shqiperise","status":"publish","type":"post","link":"https:\/\/permbledhja.com\/sq\/me-sy-nga-kosova-jeta-ne-fshatin-borje-te-shqiperise\/","title":{"rendered":"Me sy nga Kosova: Jeta n\u00eb fshatin Borje t\u00eb Shqip\u00ebris\u00eb"},"content":{"rendered":"
\n

Uji q\u00eb rrjedh n\u00eb kanalin n\u00eb an\u00eb t\u00eb rrug\u00ebs prish qet\u00ebsin\u00eb e m\u00ebngjesit n\u00eb fshatin Borje, n\u00eb veri t\u00eb Shqip\u00ebris\u00eb.<\/h3>\n

Nj\u00eb kafene e vog\u00ebl n\u00eb qend\u00ebr t\u00eb tij ishte pothuajse e zbraz\u00ebt n\u00eb nj\u00eb paradite t\u00eb fund-dhjetorit.<\/p>\n

Ka dhjet\u00eb vjet q\u00eb Biljana Jonuzi e ka hapur at\u00eb bashk\u00eb me bashk\u00ebshortin.<\/p>\n

\u201cPak kemi pun\u00eb se nuk ka njer\u00ebz\u201d, thot\u00eb Biljana teksa rregullon shamin\u00eb me ngjyra, e cila karakterizon shumic\u00ebn e grave n\u00eb zon\u00eb.<\/p>\n<\/div>\n

\n
\n
\n
\n
\"Biljana<\/div>\n<\/div>
Biljana Jonuzi, banore e fshatit Borje n\u00eb Shqip\u00ebri, ulur n\u00eb kafenen\u00eb e saj.<\/span><\/figcaption><\/figure>\n<\/div>\n<\/div>\n
\n

E lindur dhe e rritur n\u00eb Borje, 61-vje\u00e7arja kujton se shum\u00eb bashk\u00ebfshatar\u00eb t\u00eb saj, e sidomos t\u00eb rinj, kan\u00eb migruar nga fshati.<\/p>\n

\u201cIkin t\u00eb gjith\u00eb n\u00eb Gjermani, n\u00eb Angli, n\u00eb Itali… Kemi mbetur vet\u00ebm pleq\u201d, thot\u00eb Biljana p\u00ebr Radion Evropa e Lir\u00eb.<\/p>\n

Mungesa e vendeve t\u00eb pun\u00ebs, por edhe pozita e izoluar e fshatit jan\u00eb, sipas saj, arsyet kryesore t\u00eb migrimit t\u00eb banor\u00ebve me etni kryesisht gorane.<\/p>\n

Sipas Bashk\u00ebsis\u00eb s\u00eb Kuk\u00ebsit nga ky fshat kan\u00eb migruar rreth 300 banor\u00eb.<\/p>\n

N\u00eb gjith\u00eb Shqip\u00ebrin\u00eb, vet\u00ebm gjat\u00eb k\u00ebtij viti kan\u00eb migruar af\u00ebr 14 mij\u00eb qytetar\u00eb n\u00eb form\u00eb legale, tregojn\u00eb t\u00eb dh\u00ebnat zyrtare.<\/p>\n

Fshati malor i Borjes me rreth 900 banor\u00eb gjendet rreth 2 kilometra larg kufirit me Kosov\u00ebn, nd\u00ebrsa qytetin m\u00eb t\u00eb af\u00ebrt t\u00eb Shqip\u00ebris\u00eb, Kuk\u00ebsin, e ka rreth 30 kilometra larg.<\/p>\n

\n
\n
\n
\n
\"Nj\u00eb<\/div>\n<\/div>
Nj\u00eb banore e fshatit Borje duke dal\u00eb nga ahuri i bag\u00ebtive.<\/span><\/figcaption><\/figure>\n<\/div>\n<\/div>\n
\n

\u201cRruga p\u00ebr n\u00eb Kuk\u00ebs \u00ebsht\u00eb skandal\u201d, tregon Biljana, duke p\u00ebrshkruar rrug\u00ebn e pashtruar q\u00eb, sipas saj, do rreth nj\u00eb or\u00eb koh\u00eb p\u00ebr ta p\u00ebrshkuar me vetur\u00eb.<\/p>\n

K\u00ebshtu, banor\u00ebt e k\u00ebtij fshati varen kryesisht nga Kosova, si p\u00ebr pazare, ashtu edhe p\u00ebr sh\u00ebrbime t\u00eb tjera.<\/p>\n

Destinacion m\u00eb i shpesht\u00eb i borjan\u00ebve \u00ebsht\u00eb Dragashi – qytet n\u00eb jug t\u00eb Kosov\u00ebs.<\/p>\n

Disa nga ta p\u00ebrdorin vetura private, t\u00eb tjer\u00eb p\u00ebrdorin minibus\u00eb t\u00eb bashk\u00ebfshatar\u00ebve q\u00eb nisen \u00e7do dit\u00eb nga Borja rreth or\u00ebs 6 t\u00eb m\u00ebngjesit.<\/p>\n<\/div>\n

\n
\n
\n
\n
\"Distanca<\/div>\n<\/div>
Distanca nga Borja deri n\u00eb Kuk\u00ebs.<\/span><\/figcaption><\/figure>\n<\/div>\n<\/div>\n
\n

Pika kufitare mes Kosov\u00ebs e Shqip\u00ebris\u00eb n\u00eb k\u00ebt\u00eb fshat u hap n\u00eb vitin 2009.<\/p>\n

Ajo sh\u00ebrben vet\u00ebm p\u00ebr kalimin e banor\u00ebve lokal\u00eb n\u00eb t\u00eb dyja an\u00ebt e kufirit – n\u00eb nj\u00eb distanc\u00eb prej 15 kilometrash nga pika kufitare.<\/p>\n

Aty nuk \u00ebsht\u00eb parapar\u00eb t\u00eb qarkullojn\u00eb mallra n\u00eb vler\u00eb t\u00eb madhe.<\/p>\n<\/div>\n

\n
\n
\n
\n
\"Texhbid<\/div>\n<\/div>
Texhbid Behluli, pronar i nj\u00eb shitoreje n\u00eb fshatin Borje t\u00eb Shqip\u00ebris\u00eb.<\/span><\/figcaption><\/figure>\n<\/div>\n<\/div>\n
\n

Kjo i shkakton probleme Texhbid Behlulit, pronar i nj\u00eb shitoreje n\u00eb fshat q\u00eb shet shum\u00eb lloje t\u00eb mallrave – nga turshit\u00eb deri te veglat p\u00ebr pun\u00eb.<\/p>\n

\u201c[Djali], tani \u00ebsht\u00eb n\u00eb Kuk\u00ebs, ka shkuar, do t\u00eb furnizohet me mall… [Ndonj\u00ebher\u00eb furnizohet] edhe pak k\u00ebtej nga Kosova. Nganj\u00ebher\u00eb i b\u00ebjn\u00eb [probleme], pse t\u00eb furnizohesh e andej-k\u00ebtej\u201d, thot\u00eb Texhbidi p\u00ebr Radion Evropa e Lir\u00eb.<\/p>\n

Ky 85-vje\u00e7ar thot\u00eb se e siguron disi jetes\u00ebn me k\u00ebt\u00eb biznes, por se puna po i pak\u00ebsohet gjithnj\u00eb e m\u00eb shum\u00eb.<\/p>\n

Megjithat\u00eb, banor\u00ebt e qendr\u00ebs q\u00eb kan\u00eb biznese, thon\u00eb se jan\u00eb me fat q\u00eb nuk varen vet\u00ebm nga bujq\u00ebsia, me t\u00eb cil\u00ebn merret nj\u00eb pjes\u00eb e banor\u00ebve t\u00eb fshatit, m\u00eb larg nga qendra.<\/p>\n<\/div>\n

\n
\n
\n
\n
\"Sadet<\/div>\n<\/div>
Sadet Aliaj, banor i Borjes n\u00eb Shqip\u00ebri.<\/span><\/figcaption><\/figure>\n<\/div>\n<\/div>\n
\n

P\u00ebrpjet\u00eb n\u00eb fshat pak\u00ebsohen rrug\u00ebt me gur\u00eb dhe shtohen sht\u00ebpit\u00eb e nd\u00ebrtuara me k\u00ebt\u00eb material.<\/p>\n

Nj\u00eb t\u00eb till\u00eb e ka edhe Sadet Aliaj, i cili po e nxirrte jasht\u00eb oborrit kalin e tij ngjyr\u00eb kafeje.<\/p>\n

\u201cMe [kalin] l\u00ebroj, punoj, bart dru, pleh… T\u00eb gjitha i b\u00ebn ky\u201d, thot\u00eb Sadeti.<\/p>\n

Bag\u00ebti, e sidomos kuaj e mushka, mund t\u00eb shihen gjithkund n\u00ebp\u00ebr rrug\u00ebt e Borjes.<\/p>\n

Ve\u00e7 tjerash, ato bartin edhe t\u00eb mbjellat e fshatar\u00ebve, q\u00eb kryesisht jan\u00eb patatet.<\/p>\n

Por, gjat\u00eb ver\u00ebs, kultivojn\u00eb edhe lule e bim\u00eb aromatike, t\u00eb cilat m\u00eb pas i shesin n\u00eb Kosov\u00eb.<\/p>\n<\/div>\n

\n
\n
\n
\n
\"Banor<\/div>\n<\/div>
Banor i fshatit Borje duke bartur patate me kalin e tij.<\/span><\/figcaption><\/figure>\n<\/div>\n<\/div>\n
\n

Nga patatja q\u00eb e mbjell \u00e7do vit, Shate Palinci thot\u00eb se sivjet nuk pati shum\u00eb fitim.<\/p>\n

\u201cPak kemi sivjet, i ka ngr\u00ebn\u00eb derri i eg\u00ebr\u201d, ankohet ajo, duke i p\u00ebrgatitur disa nga patatet e vogla p\u00ebr t\u2019ua dh\u00ebn\u00eb bag\u00ebtive.<\/p>\n

Kjo 40-vje\u00e7are ka tre f\u00ebmij\u00eb, p\u00ebrfshir\u00eb nj\u00eb vajz\u00eb 15 vje\u00e7e t\u00eb martuar.<\/p>\n<\/div>\n

\n
\n
\n
\n
\"Distanca<\/div>\n<\/div>
Distanca nga Borja deri n\u00eb Dragash.<\/span><\/figcaption><\/figure>\n<\/div>\n<\/div>\n
\n

Burri dhe djali i saj i madh, 20-vje\u00e7ar, shkojn\u00eb shpesh n\u00eb Kosov\u00eb p\u00ebr t\u2019i shitur produktet e tyre bujq\u00ebsore, por edhe p\u00ebr t\u00eb b\u00ebr\u00eb ndonj\u00eb pun\u00eb tjet\u00ebr t\u00eb p\u00ebrkohshme.<\/p>\n

Shatja ka frik\u00eb p\u00ebr ndonj\u00eb mbyllje eventuale t\u00eb kufirit me Kosov\u00ebn, sikur kishte ndodhur p\u00ebr disa muaj gjat\u00eb pandemis\u00eb COVID-19.<\/p>\n

\u201cGjat\u00eb koron\u00ebs [pandemis\u00eb], kemi qen\u00eb t\u00eb gjith\u00eb t\u00eb mbyllur. As n\u00eb Kuk\u00ebs, as kurrkund. Vet\u00ebm n\u00eb sht\u00ebpi… \u00e7far\u00eb kemi pasur, kemi ngr\u00ebn\u00eb. Nuk ka m\u00eb v\u00ebshtir\u00eb\u201d, kujton Shatja.<\/p>\n<\/div>\n

\n
\n
\n
\n
\"Pamje<\/div>\n<\/div>
Pamje nga lart e fshatit Borje n\u00eb Shqip\u00ebri.<\/span><\/figcaption><\/figure>\n<\/div>\n<\/div>\n
\n

Tjet\u00ebr hall p\u00ebr t\u00eb \u00ebsht\u00eb mungesa e nj\u00eb spitali t\u00eb af\u00ebrt n\u00eb Shqip\u00ebri.<\/p>\n

\u201c[N\u00eb Borje] s\u00ebmuresh e nuk vjen askush t\u00eb t\u00eb b\u00ebj\u00eb gjilp\u00ebr\u00eb [injeksion], as t\u00eb t\u00eb shikoj\u00eb\u201d, thot\u00eb Shatja.<\/p>\n

Edhe p\u00ebr sh\u00ebrbime sh\u00ebndet\u00ebsore, ajo thot\u00eb se banor\u00ebt e fshatit shkojn\u00eb kryesisht n\u00eb Kosov\u00eb.<\/p>\n

\u201cP\u00ebr dh\u00ebmb\u00eb e p\u00ebr t\u00eb gjitha… n\u00ebse kemi di\u00e7ka, shkojm\u00eb n\u00eb Kosov\u00eb\u201d, thot\u00eb ajo.<\/p>\n

Nga Qendra e Mjek\u00ebsis\u00eb Familjare n\u00eb Dragash thon\u00eb p\u00ebr Radion Evropa e Lir\u00eb se, \u00e7do dit\u00eb, presin dhjet\u00ebra pacient\u00eb nga Borja dhe zona t\u00eb tjera kufitare t\u00eb Shqip\u00ebris\u00eb.<\/p>\n<\/div>\n

\n
\n
\n
\n
\"Nj\u00eb<\/div>\n<\/div>
Nj\u00eb burr\u00eb dhe grua n\u00eb mosh\u00eb teksa ecin rrug\u00ebve t\u00eb fshatit Borje.<\/span><\/figcaption><\/figure>\n<\/div>\n<\/div>\n
\n

Kur mbetet e vetme n\u00eb sht\u00ebpi, Shatja llogarit edhe n\u00eb ndihm\u00ebn e djalit t\u00eb saj 9-vje\u00e7ar p\u00ebr pun\u00ebt me bag\u00ebtit\u00eb.<\/p>\n

Por, me r\u00ebnien e bor\u00ebs, ajo thot\u00eb se djali ka d\u00ebshir\u00eb edhe t\u00eb rr\u00ebshqas\u00eb me shok\u00ebt, pasi kryen orarin e m\u00ebsimit n\u00eb shkoll\u00ebn q\u00eb gjendet m\u00eb af\u00ebr qendr\u00ebs s\u00eb fshatit.<\/p>\n

Nga kodra lart ku banon, ajo e pret dhe e p\u00ebrcjell me sy djalin teksa ngjitet rrug\u00ebve q\u00eb kan\u00eb nisur t\u00eb b\u00ebhen v\u00ebshtir\u00eb t\u00eb kalueshme nga bora dhe balta.<\/p>\n<\/div>\n

\n
\n
\n
\n
\"F\u00ebmij\u00eb<\/div>\n<\/div>
F\u00ebmij\u00eb t\u00eb fshatit Borje duke rr\u00ebshqitur af\u00ebr shkoll\u00ebs n\u00eb fshatin Borje.<\/span><\/figcaption><\/figure>\n<\/div>\n<\/div>\n
\n

Borja, aktualisht, ka vet\u00ebm shkoll\u00ebn fillore 9-vje\u00e7are, nd\u00ebrsa p\u00ebr t\u00eb kryer shkoll\u00ebn e mesme, nx\u00ebn\u00ebsit duhet t\u00eb shkojn\u00eb n\u00eb fshatin Shishtavec, rreth 11 kilometra larg.<\/p>\n

Shkolla \u201cXhafer Ollomani\u201d n\u00eb Borje, sipas t\u00eb dh\u00ebnave publike ka rreth 100 nx\u00ebn\u00ebs.<\/p>\n

Banor\u00ebt thon\u00eb se jan\u00eb ankuar disa her\u00eb te Komuna e Kuk\u00ebsit p\u00ebr munges\u00eb t\u00eb infrastruktur\u00ebs, por deri m\u00eb tani pa rezultat.<\/p>\n

\u201cP\u00ebr vota [vijn\u00eb], por rruga zero\u201d, thot\u00eb Biljana. \u201cPo t\u00eb mos ishte Kosova, Borja do t\u00eb kishte ngordhur\u201d, thot\u00eb ajo.<\/p>\n<\/div>\n

\n
\n
\n
\n
\"Banore<\/div>\n<\/div>
Banore e fshatit Borje.<\/span><\/figcaption><\/figure>\n<\/div>\n<\/div>\n
\n

Bashkia e Kuk\u00ebsit n\u00eb Shqip\u00ebri ka th\u00ebn\u00eb se arsyeja pse nuk \u00ebsht\u00eb e asfaltuar rruga Borje-Kuk\u00ebs \u00ebsht\u00eb p\u00ebr shkak t\u00eb munges\u00ebs s\u00eb fondeve.<\/p>\n

“Rruga nuk \u00ebsht\u00eb shtruar p\u00ebr shkak t\u00eb munges\u00ebs s\u00eb fondeve ku pjesa m\u00eb e madhe e fshatrave t\u00eb Kuk\u00ebsit jan\u00eb rrug\u00eb rurale”, thuhet n\u00eb p\u00ebrgjigjen dh\u00ebn\u00eb Radios Evropa e Lir\u00eb.\/REL<\/p>\n