{"id":34585,"date":"2023-11-04T10:46:02","date_gmt":"2023-11-04T10:46:02","guid":{"rendered":"https:\/\/permbledhja.com\/?p=34585"},"modified":"2023-11-04T10:46:02","modified_gmt":"2023-11-04T10:46:02","slug":"ribashkimi-i-radikaleve-si-duhet-ta-lexojme-koalicionin-e-vuciqit-me-sheshelin-e-denuar-per-krime-lufte","status":"publish","type":"post","link":"https:\/\/permbledhja.com\/sq\/ribashkimi-i-radikaleve-si-duhet-ta-lexojme-koalicionin-e-vuciqit-me-sheshelin-e-denuar-per-krime-lufte\/","title":{"rendered":"\u201cRibashkimi i radikal\u00ebve\u201d: Si duhet ta lexojm\u00eb koalicionin e Vu\u00e7iqit me Sheshelin e d\u00ebnuar p\u00ebr krime lufte?"},"content":{"rendered":"

17 dhjetori \u00ebsht\u00eb data, kur n\u00eb Serbi do t\u00eb mbahen zgjedhjet e jasht\u00ebzakonshme parlamentare dhe zgjedhjet lokale n\u00eb disa komuna, p\u00ebrfshir\u00eb kryeqytetin serb, Beogradin. Pik\u00ebrisht p\u00ebr k\u00ebt\u00eb qytet duket t\u00eb jet\u00eb gara m\u00eb e ashp\u00ebr, gj\u00eb q\u00eb ka kulmuar me nj\u00eb koalicion shqet\u00ebsues mes Aleksandar Vu\u00e7iqit, president aktual i Serbis\u00eb, dhe\u00a0nj\u00eb t\u00eb d\u00ebnuari p\u00ebr krime lufte, Vojislav Sheshel<\/a>. Pse ndodhi ky koalicion?<\/h3>\n

Ishte politikani me bindje radikale, pra Shesheli, q\u00eb e konfirmoi arritjen e koalicionit p\u00ebr zgjedhjet lokale n\u00eb Beograd dhe n\u00eb disa qytete t\u00eb tjera t\u00eb Serbis\u00eb. P\u00ebrve\u00e7 ribashkimit t\u00eb Vu\u00e7iqit me kriminelin e d\u00ebnuar p\u00ebr krime lufte nga Tribunali i Hag\u00ebs, n\u00eb sken\u00ebn politike \u00ebsht\u00eb \u201crikthyer\u201d Tomisllav Nikoliqi, ish-president i Serbis\u00eb, q\u00eb dikur bashk\u00eb me Vu\u00e7iqin ishte pjes\u00eb e Partis\u00eb Radikale Serbe (SRS) t\u00eb Sheshelit.<\/p>\n

Sipas profesorit universitar, Milazim Krasniqi, ndon\u00ebse koalicioni mes Vu\u00e7iqit dhe Sheshelit \u00ebsht\u00eb ve\u00e7 p\u00ebr zgjedhjet lokale, ai ka p\u00ebr synim t\u00eb ndikoj\u00eb edhe n\u00eb ato parlamentare. N\u00eb p\u00ebrgjigjen e tij, profesori Krasniqi e v\u00eb theksin te \u201csentimentet pansllaviste e fashiste\u201d dhe te gara p\u00ebr votat e s\u00eb djatht\u00ebs ekstreme.<\/p>\n

\u201cKoalicioni \u00ebsht\u00eb p\u00ebr zgjedhjet lokale, por me synim q\u00eb t\u00eb ndikoj\u00eb edhe n\u00eb ato parlamentare, duke marr\u00eb nj\u00eb pjes\u00eb t\u00eb votave t\u00eb ekstremit t\u00eb djatht\u00eb. Disa parti t\u00eb esktremit t\u00eb djatht\u00eb jan\u00eb etabluar n\u00eb sken\u00ebn politike dhe e k\u00ebrc\u00ebnojn\u00eb seriozisht fitoren e Vu\u00e7iqit. Prandaj \u00ebsht\u00eb b\u00ebr\u00eb koalicion me Sheshelin dhe \u00ebsht\u00eb ftuar edhe Tomislalv Nikoliqi n\u00eb ndihm\u00eb. Kontesti kryesor i esktremit t\u00eb djatht\u00eb me Vuciqin \u00ebsht\u00eb q\u00ebndrimi ndaj Rusis\u00eb, pasi ata duan faktikisht jo vet\u00ebm t\u00eb mos vendosen sanksione, po edhe t\u00eb p\u00ebrkrahet agresioni n\u00eb Ukrain\u00eb dhe madje edhe nj\u00ebfar\u00eb bashkimi me Rusin\u00eb. N\u00eb k\u00ebt\u00eb \u00e7\u00ebshtje, Shesheli i konkuron shum\u00eb seriozisht. pasi kur ishte n\u00eb qeverin\u00eb federale, \u00ebsht\u00eb miratuar nj\u00eb dokument p\u00ebr bashkimin e Jugosllavis\u00eb (Serbis\u00eb) me Rusin\u00eb e me Bjellorusin\u00eb. Pra, synohet t\u00eb nxirren ato sentimente pansllaviste e fashiste, p\u00ebr t\u00eb cilat Shesheli \u00ebsht\u00eb kapo-banda\u201d<\/i>\u00a0\u2013 theksoi Krasniqi p\u00ebr Nacionalen.<\/p>\n

Gazetari veteran, Halil Matoshi, q\u00eb \u00ebsht\u00eb edhe njoh\u00ebs i mir\u00eb i politik\u00ebs serbe, ka nj\u00eb interpretim interesant n\u00eb lidhje me koalicionin shqet\u00ebsues t\u00eb Vu\u00e7iqit me ish-mentorin e tij politik, Sheshel. Matoshi i theksoi \u201cpsikoz\u00ebn permanente\u201d t\u00eb Serbis\u00eb dhe pamund\u00ebsin\u00eb e shk\u00ebputjes me t\u00eb kaluar\u00ebn kriminale dhe bashkimit me \u201clokomotiv\u00ebn progresiste e demokratike\u201d.<\/p>\n

\u201cSerbia \u00ebsht\u00eb n\u00eb psikoz\u00eb permanente, sepse nuk po mundet me e kap\u00ebrcy pragun e ndarjes nga e kaluara kriminale p\u00ebr me u ngjit\u00eb n\u00eb lokomotiv\u00ebn progresiste e demokratike. Por luft\u00eb nuk mundet t\u00eb b\u00ebj\u00eb m\u00eb. \u00cbsht\u00eb e rrethuar nga NATO-ja, pra nuk \u00ebsht\u00eb nj\u00eb vend karpatian dhe, mbi t\u00eb gjitha, ekziston nj\u00eb aleanc\u00eb e madhe e vendeve ballkanike t\u00eb demokratizuara q\u00eb rezistojn\u00eb si unike dhe, e fundit, e ka n\u00ebnshkru kapitullimin n\u00eb Kumanov\u00eb m\u00eb 9 -10 qershor 1999\u201d<\/i>\u00a0\u2013 deklaroi Matoshi p\u00ebr Nacionalen.<\/p>\n

T\u00eb premten, Bojan Pajtiqi, duke folur p\u00ebr gazet\u00ebn opozitare serbe, \u201cDanas\u201d, vler\u00ebsoi se koalicioni i Vu\u00e7iqit me Sheshelin \u00ebsht\u00eb \u201cnj\u00eb ribashkim i radikal\u00ebve\u201d. Sipas ish-kryeministrit t\u00eb Vojvodin\u00ebs, sa her\u00eb q\u00eb k\u00ebta tre politikan\u00eb – Vu\u00e7iqi, Shesheli dhe Nikoliqi – kan\u00eb qen\u00eb s\u00eb bashku, Serbia ka hyr\u00eb n\u00eb luft\u00eb.<\/p>\n

\n

\u201cNj\u00eb njeri nuk i ndryshon aq leht\u00eb bindjet e tij themelore pas mosh\u00ebs 45-vje\u00e7are dhe m\u00eb shpesh nuk i ndryshon ato fare. Problemi m\u00eb i vog\u00ebl \u00ebsht\u00eb se radikal\u00ebt e bashkuar do t\u00eb garojn\u00eb s\u00eb bashku p\u00ebr votat. \u00cbsht\u00eb nj\u00eb problem shum\u00eb m\u00eb i madh, n\u00ebse ata fillojn\u00eb t\u2019i ndjekin p\u00ebrs\u00ebri kroat\u00ebt, hungarez\u00ebt, boshnjak\u00ebt, shqiptar\u00ebt dhe an\u00ebtar\u00ebt e komuniteteve t\u00eb tjera komb\u00ebtare. Sa her\u00eb q\u00eb k\u00ebta tre kalor\u00ebs t\u00eb apokalipsit (i kat\u00ebrti, Millosheviqi, justifikuesh\u00ebm mungon) ishin bashk\u00eb, ky vend hynte n\u00eb luft\u00ebra dhe humbi luft\u00ebra, duke jetuar disa nga vitet m\u00eb t\u00eb v\u00ebshtira t\u00eb historis\u00eb s\u00eb tij\u201d<\/i>\u2013 shtoi Pajtiqi p\u00ebr “Danas”-in.<\/p>\n<\/div>\n