Qeveria e Kosovës ka miratuar dy vendime ku kërkohet dhënia e autorizimit të presidentes së vendit, Vjosa Osmani, në lidhje me dy marrëveshje ndërkombëtare.
Nga qeveria u miratua vendimi për kërkesë ndaj Osmanit për dhënien e autorizimit për nënshkrimin e amendamentimit numër tre të marrëveshjes financiare në mes Kosovës dhe BE-së për programin “IPA 2015”.
“Qëllimi i këtij amendamenti është mundësimi i shtyrjes së afatit të parashikuar për zbatimin e projekteve të kësaj marrëveshjeje dhe kjo është e nevojshme në mënyrë që të mundësohet lansimi i sërishëm i tenderit për përkrahjen e procesit të de-komisionimit të pjesëve jo-operative të Termocentralit Kosova ‘A’”, tha zëvendëskryeministri Besnik Bislimi.
Tutje, ai tha se teksti për këtë marrëveshje është finalizuar më 24 nëntor, ndërsa tash duhet të vazhdohet me procedurat e marrjes së autorizimit për nënshkrim.
Po ashtu, qeveria kërkoi nga presidentja e vendit dhënien e autorizimit për ministren e Drejtësisë, Albulena Haxhiu, për nënshkrimin e marrëveshjes mes BE-së dhe Kosovës për pjesëmarrje në programin “Drejtësia”.
Në lidhje me këtë, zëvendësministri i Drejtësisë, Blerim Sallahu, tha se programi “Drejtësia” ka për synim të forcojë demokracinë, sundimin e ligjit dhe të drejtat themelore.
“Më këtë rast, ju njoftoj se pas miratimit të nismës, është formuar delegacioni teknik që e ka finalizuar tekstin e marrëveshjes me përfaqësuesit e BE-së”, tha Sallahu.