Kryeministri i Republikës së Kosovës, Albin Kurti, ka folur për cështjen e themelimit të Asociacionit të Komunave me shumicë serbe në Kosovë, duke thënë se marrëveshja e vitit 2015 e arritur në Bruskes, nuk e ka kaluar kushtetushmërinë për të cilën ka vendosur Gjykata Kushtetuese e Kosovës.
Në një intervistë për mediumin slloven RTV Slovenia, Kurti ka thënë se çështjet janë shumë komplekse, por duhet të zbatohet marrëveshja e arritur. Ai ka folur edhe për integrimin e qytetarëve të nacionalitetit serb në institucionet e Kosovës, ku ka përmendur edhe bashkëpunimin e tij me ministrin për Komunitete dhe Kthim, Nenad Rashiq.
“Pra, çështjet janë shumë komplekse dhe unë them: ta zbatojmë marrëveshjen që kemi bërë. Unë nuk jam vetëm për një armëpushim për shqiptarët, por për të gjithë banorët e Kosovës. Është e vërtetë se në Kosovë jetojnë 93 për qind e shqiptarëve, por edhe katër për qind e serbëve. Tre për qind janë nga pakicat tjera – romët, boshnjakët, ashkalinjtë, egjiptianët, goranët dhe turqit. Dhe serbët, për shembull, kanë dhjetë vende të rezervuara në parlamentin e Kosovës, nëse nuk votojnë fare, duhet të jenë dhjetë prej tyre në Kuvendin prej 120 anëtarësh. Gjithashtu duhet të ketë të paktën një ministër serb në qeveri. Mora Nenad Rashiqin, me të cilin punoj shumë mirë, por për këtë ai është i urryer në Beograd”, ka thënë kryeministri kosovar.
Kurti është shprehur se Kosova po përpiqet maksimalisht që të normalizojë marrëdhëniet, por sipas tij, Serbia nuk është larguar kurrë realisht nga politike e Sllobodan Millosheviqit nga e kaluara, e as nga e Vladimir Putinit në të tashmen.
“Edhe në kuvendet lokale në Kosovë, 17 për qind janë serbë. Në Kosovë, gjuha serbe është gjuhë zyrtare në të gjitha nivelet e administratës, në mbarë Kosovën. Prandaj, më besoni, ne vërtet po mundohemi, po bëjmë më të mirën që mundemi, por nuk është e lehtë, sepse Beogradi zyrtar kurrë nuk është larguar realisht nga politika e Sllobodan Millosheviqit nga e kaluara, as nga Vladimir Putin në të tashmen. Për shembull, mbështetja për Bashkimin Evropian është 94% në Kosovë, 35% në Serbi. Nuk është e lehtë, por besoj se me një perspektivë të qartë të anëtarësimit në Bashkimin Evropian, ne mund të kemi sukses në një marrëveshje të madhe për të ulur tensionet dhe për të normalizuar marrëdhëniet”, ka thënë Kurti.
Sa i përket çështjes së Asociacionit, Kurti ka thënë se janë dy marrëveshje, ajo e vitit 2013 dhe e vitit 2015, për të cilën thotë se janë shkelur 23 nene të Kushtetutës së Kosovës.
“Janë dy marrëveshje për Bashkimin e Komunave Serbe, njëra e vitit 2013 dhe tjetra e vitit 2015. Këto janë vetëm dy nga 39 marrëveshjet që paraardhësit e mi si kryeministër i kanë lidhur në Bruksel. Dhe, neni 10 i marrëveshjes që e kam lidhur në Bruksel me presidentin serb Aleksandar Vuçiq më 27 shkurt, parasheh zbatimin e pjesëve që janë të vlefshme dhe të detyrueshme. Ne duhet ta zbatojmë plotësisht dhe pa kushte këtë marrëveshje bazë, pasi të gjitha çështjet e pazgjidhura trajtohen në këtë marrëveshje. Marrëveshja e vitit 2015 nuk e ka kaluar kushtetutshmërinë për të cilën ka vendosur Gjykata Kushtetuese e Kosovës. Gjegjësisht, ata krijuan një bashkim me pushtet ekzekutiv, të cilin e përfshinë pjesërisht nga Ligji për Qeverinë dhe pjesërisht nga Ligji për Komunat. Dhe kështu kanë shkelur 23 nene të Kushtetutës së Kosovës. Sa i përket marrëveshjes së Brukselit të vitit 2013, e cila ka 15 pika; Gjashtë pikat e para kanë të bëjnë me formimin e Unionit të Komunave Serbe dhe shumica e të tjerave kanë të bëjnë me integrimin e serbëve në institucionet e Kosovës, gjë që nuk ndodhi në veri të Kosovës. Madje një nga pikat thotë se Serbia nuk duhet të pengojë rrugën e Kosovës drejt integrimeve evropiane. Por më 10 dhjetor të vitit të kaluar, presidenti serb u dërgoi letra pesë vendeve të Bashkimit Evropian që nuk e njohën Kosovën, duke u thënë që të mos e bëjnë këtë, duke thyer marrëveshjen e tij më të shtrenjtë të Brukselit”, ka thënë kreu i Qeverisë së Kosovës.