Komisioni Evropian ka njoftuar sot miratimin e pakos së re mbështetëse prej 171 milionë eurosh për të nxitur zhvillimin e infrastrukturës dhe rritjen e sektorit privat në vendet partnere të Ballkanit Perëndimor.
Ndërsa fondet janë shpërndarë për projekte specifike në Shqipëri, Maqedoni të Veriut, Mal të Zi dhe Bosnje e Hercegovinë, Kosova nuk figuron në listën e projekteve të miratuara.
Paketa e re përfshin kontribute investimi nga burime të ndryshme të financimit të BE-së, si Instrumenti për Asistencën e Para-anëtarësimit (IPA III) dhe Lehtësia e Reformës dhe Rritjes (RGF).
Zëdhënësi i Komisionit Evropian, Guillaume Mercier, kishte sqaruar se Kosova mbetet e bllokuar për shkak të mospërmbushjes së kritereve ligjore. Konkretisht, mungesa e ratifikimit të Marrëveshjes së Kredisë dhe Lehtësisë në kuadër të Instrumentit për Reforma dhe Rritje e bën të pamundur ekzekutimin e pagesave.