Konservatorët kosovarë do të marrin pjesë në zgjedhjet nacionale.
Këtë e pat thënë vetë ish-deputeti Eman Rrahmani përmes një video-adresimi, duke thënë se grupi që në zgjedhjet e 9 shkurtit mori pjesë nën siglën e Listës për Familjen, do të jetë në emrat zgjedhorë edhe më 28 dhjetor.
Nuk ka shkuar shumë dhe Përmbledhja.com është interesuar rreth kësaj çështjeje. Përderisa kah kampi konservator janë mbyllur hermetikisht, redaksia jonë nga burime të afërta brenda PDK-së ka mësuar se bëhet fjalë për një afrim shumë të madh mes palëve.
Madje, siç bëhet e ditur janë vendosur edhe disa lëvizje në listë, kurse është bërë e ditur që vetë PDK-ja ka pranuar kushtet rreth Kodit Civil, për të cilin ligj ka edhe deputetë të vetë Partisë Demokratike që janë kundër.
Nga çështjet interesante që kemi kuptuar nga bisedat me këtë burim pranë PDK-së është se kjo e fundit pritet t’i sigurojë një vend në top-dhjetëshe këtyre kandidatëve konservatorë, e që do të jetë Eman Rrahmani, për shkak edhe të pozicionit që mbante në zgjedhjet e fundit, si bartës liste.
Kujtojmë, Lista për Familjen mori afër 2.5% në zgjedhjet paraprake dhe votat përkatëse mund të luajnë rol të rëndësishëm për pozicionim partiak, veçanërisht në renditje./Përmbledhja