Në Gjykatën Themelore të Ferizajt po mbahet seanca për caktimin e sigurisë ndaj Valon Aliut, i dyshuar për vrasjen e ish-bashkëshortes së tij dhe plagosjen e vëllait të saj, dje në Qendrën për Punë Sociale në Ferizaj.
T7 po e përcjell këtë seancë, prej ku ka siguruar pamje ku dëgjohet avokati i 26 vjeçarit duke thënë se klienti i tij është penduar për veprën e kryer.
“Siç është deklaruar, nuk e di se cilin e ka gjuajt përpara. I njëjti tani e ka kuptuar dhe është penduar për veprën e kryer. Në këtë pikë e kundërshtojmë kërkesën e prokurorisë se ka kryer veprën penale “Vrasje e rëndë””, ka thënë ai.
Ai tregoi për një mosmarrvëeshje mes tyre një natë para se të ndodhte vrasja.
“Një natë më parë, para se të ndodhë ngjarja, i pandehuri ka kërkuar që ta shoh djalin përmes telefonit, e ndjera nuk ia ka mundësuar, e ka fyer, e ka injoruar dhe e ka poshtëruar me fjalë të ndryshme”, deklaroi avokati.