Me blerjen e dronëve “Bayraktar”, viti 2023 u konsiderua si viti me buxhetin më të lartë të investuar në fushën e mbrojtjes.
E krahasuar me vitin paraprak, buxheti për vitin 2024 u rrit për 30 milionë euro më shumë.
Por, kjo duket se nuk ndikoi që Kosova të ngriter në pozitë më të lartë të fuqisë ushtarake.
Madje ra një pozitë më poshtë.
E lidhur me këtë, Tëvë 1 ka kërkuar një qëndrim nga Ministria e Mbrojtjes, e cila përmes një përgjigje me shkrim u tha se investimet në armatime po bëhen në mënyrë të vazhdueshme.
Nga ky dikaster, u shprehën se kjo rënie ka ndodhur për shkak se shtetet tjera më të mëdha kanë bërë investime më të theksuara.
“Investimet në armatime janë duke u bërë në mënyrë të vazhdueshme, ashtu siç edhe po investohet në ngritjen e kapaciteteve profesionale përmes trajnimit dhe shkollimi të ushtarakëve. Një matje e tillë nuk do të thotë se Kosova ka pësuar regres në aspektin e fuqisë ushtarake për shkak të mosinvestimit, porse shtetet tjera më të mëdha në raport me buxhetin e përgjithshëm kanë bërë investime më të theksuara konform mundësive buxhetore të tyre që sigurisht se tejkalojnë mundësitë e Kosovës”, thuhet nga ministria për Tëvë 1.
E ish koloneli i FSK-së, Hysen Gecaj thotë se deri te kjo ka ardhur për shkak se nuk është investuar mjaftueshëm për nevojat e ushtrisë së vendit.
Kurse, njohësi i fushës së sigurisë, Nuredin Ibishi tregon edhe disa nga fushat tjera në të cilat realizohet kjo matje e fuqisë.
Platforma “Global Fire Power” e bënë për çdo vit vlerësimin e fuqisë ushtarake për 145 shtete të ndryshme të botës.
Kosova radhitet në vendin e 135-të për vitin 2024.
