Tahir Ahmeti, njohës i çështjeve të emergjencave dhe njëherësh Drejtor Ekzekutiv i Qendrës Kërkimore për Politika të Sigurisë (SPRC), ka kërkuar nga institucionet që të ndalojnë plotësisht shitjen e mjeteve piroteknike.
Përmes një postimi në Facebook, ai ka thënë se këtë fundvit rreth 25 qytetarë (kryesisht të mitur) të lënduar nga mjetet piroteknike, kanë kërkuar ndihmë mjekësore në Klinikën Emergjente në Prishtinë.
“Kjo nuk guxon të ndodh më. Nga ky vit, institucionet duhet të ndalojnë plotësisht shitjen e mjeteve piroteknike, ndërsa vetëm komunat dhe qeveria të organizojnë spektakle me fishekzjarrë në ndërrim të viteve”, ka shkruar Tahiri.
Ai ka theksuar se siguria e qytetarëve është primare.
Rastet më ekstreme të trajtuara në Emergjencën e QKUK-së në natën e ndërrimit të motmoteve ishin një fëmijë, i cili ka të amportuar dy gishtërinj dhe një pacient i lënduar nga plumbi qorr, i cili i është nënshtruar operacionit.