Ministrat e Jashtëm të vendeve anëtare të NATO-s do të takohen nga sot deri më 29 nëntor në Bruksel dhe në qendër të takimit do të jetë agresioni rus në Ukrainë dhe situata në Ballkanin Perëndimor.
Sekretari i Përgjithshëm i NATO-s, Jens Stoltenberg, e ka konfirmuar se një nga temat kryesore të diskutimit do jetë situata e sigurisë në Kosovë.
Në një konferencë për media nga Brukseli, Stoltenberg tha se “kemi parë dhunë serioze në veri të Kosovës, retorikë ndarëse e shkëputëse në Bosnjë Hercegovinë, dhe tentime malinje të ndërhyrjeve përfshirë ato nga Rusia”.
Ai ka folur edhe për rritjen e pranisë së NATO-s në Kosovë, duke thënë se po e shqyrtojnë një prani më të qëndrueshme.
“Bashkë me Përfaqësuesin e Lartë të BE-së (Josep Borrell) ne do të diskutojmë mënyrat që të rrisim stabilitetin në rajon. NATO-ja tashmë ka shtuar 1000 (njëmijë) trupa në Kosovë. Dhe ne jemi duke ekzaminuar një prani më të qëndrueshme në Kosovë”.
Stoltenger sërish i ka bërë thirrje Kosovës e Serbisë, që t’i kthehen dialogut, pasi stabiliteti varet edhe nga ky proces.
“ Beogradi dhe Prishtina, duhet të riangazhohen në dialogun e lehtësuar nga Bashkimi Evropian. Stabilitetit varet nga të gjitha palët që zgjedhin dialogun dhe diplomacinë, në vend të konfliktit dhe kaosit”, tha Stoltenberg.